A revista Quaderns del CAC vén de abrir a convocatoria para presentar traballos que formarán parte do seu próximo monográfico, o número 43. Este estará adicado á análise da diversidade nas industrias culturais e das iniciativas de protección e promoción, arredor do cal propoñen os seguintes temas de interese:
– Avaliación do impacto da Convención sobre a protección e promoción da diversidade das expresións culturais (UNESCO, 2005) a unha década da súa posta en marcha.
– Implementación e adaptación da Convención 2005 da UNESCO na era dixital.
– Os axentes culturais na Internet e as prácticas que contribúen coa súa diversidade: cartografía e desafíos.
– A diversidade no sector audiovisual dixital (cine, radio, televisión, música, videoxogos, OTT): contidos, estrutura e políticas públicas.
– Boas prácticas para a diversidade nas industrias culturais.
– Dereitos de autor, copyright e diversidade nas industrias culturais.
– Medición e estatísticas para avaliar a diversidade das expresións culturais.
– Problemáticas específicas da diversidade nas culturas das nacións sen estado.
Ademais disto, a revista ten unha sección miscelánea chamada “Artículos” para a que aceptan investigacións en curso sobre comunicación e cultura audiovisual. A data límite para a presentación de traballos é o 13 de marzo de 2017, e as normas poden descargarse neste enlace. Os artigos enviaranse a quadernsdelcac@gencat.cat.